二○一二年選舉格局大變動，由於有區議會功能界別嘅「超級議席」，好多重量級政治人物都有參加區議會選舉嘅心，啱啱輸掉區議會薄扶林選區補選嘅匯賢智庫都有咁嘅部署。據聞，主席葉劉淑儀一年前已向富貴黨主席劉健儀（Miriam）探路，希望協調吓山頂選區嘅形勢，但Miriam堅持派人競逐，令葉劉無功而還，一年後葉劉可能再度叩門，只係會唔會再食檸檬就要拭目以待。
山頂選區以前係富貴黨嘅地盤，前主席田北俊九九年當選區議員，○三年交棒黨員林文傑，但○七年卻被公文袋陳淑莊挑戰成功，老巢失陷。家吓「超級議席」橫空出世，政治老手都部署選區議會，消息指，匯賢智庫輸掉薄扶林區議會議席，葉劉對明年區選甚至一二年立法會區議會超級議席雄心未減，打算再諗山頂選區。至於富貴黨本身，外間亦有傳田少至今未排除代表該黨競逐超級議席，第一步可能就係重新奪回老巢，硬撼公文袋嘅陳淑莊避無可避。
尋日問葉劉，佢話富貴黨喺山頂選區有相當實力，○七年只輸陳淑莊一百餘票；若然明年無富貴黨讓路，佢出戰山頂選區唔實際。言下之意，默認想富貴黨成全佢嘅參選大計。問到有傳佢會再向富貴黨敲門，葉劉就賣關子，話薄扶林補選啱啱結束，要放假叉電，稍後才會認真考慮咁話。