柴灣青年廣場豪花七億元建成，但因位置唔就腳，宣傳又不足，好多人都唔知有呢座建築物。直到早前有「80後」喺嗰度掟鞋示威，加上黃栢高（Paco）等食家喺度開食肆先多啲人認識。不過，當局都決定展開救亡，尋日委任多五名青年廣場管理諮詢委員會委員，本身係委員嘅青年事務委員會主席陳振彬（Bunny）仲揚言，已經度定好橋令廣場起死回生添！
港府尋日委任咗香港青年聯會副主席鄭重科等五個新委員加入青年廣場管理諮詢委員會，任期由即日起至一一年尾，似乎想打救冇乜起色嘅青年廣場。
Bunny尋日就幫廣場解畫，話現時嘅使用率已有改善，酒店旅舍率有八成半之餘，寫字樓租用率更加係爆晒棚。
Bunny又揚言嚟緊會搞搞新意思，年尾會將「全球華人新秀大賽」呢啲咁受追捧嘅節目破格移師去青年廣場舉行，又會安排夠晒young嘅新世紀青年管弦樂團嚟表演，佢話有信心可以俘虜到班「80後」喎。