本文重點
新學年拉開序幕，香港教育學院尋日都舉行開學禮，「單車王子」黃金寶同師弟郭灝霆齊齊入讀教院今年首次開辦嘅健康教育（榮譽）學士課程，阿寶要重拾丟低咗廿年嘅書包，真係唔容易，但佢都好想喺單車生涯外搵到自己嘅轉型之路，睇嚟已經有好多單車賽事冠軍銜頭嘅阿寶，最希望頭上有頂四方帽。
想服務青年老人
阿寶嘅學科將來主要服務學童、青少年、成人同病者等不同社區，由於阿寶打算兩年後先正式退役，所以家吓要練習與學業兼顧，好彩學校有視像系統，可以幫到未必日日返到學嘅阿寶學習，當然到咗考試日就一定要現身啦！
家中排行第六嘅阿寶話，佢屋企有七兄弟姊妹，細個時經常無王管，自己簡直好似「邊青」咁，無心向學之外，只係掛住玩同踩單車。反而大個咗，阿寶更明白讀書嘅重要，亦希望修讀課程後可以改善自己嘅不足，將來服務青年同老人，因為佢好關心青年濫藥問題，希望可以用運動員嘅健康精神，以身教輔導年輕人唔好走向歧途。加上阿寶手車咁快，到時唔怕會遲到。