外交部發言人被視為國家嘅代表，曾任國家外交部發言人、現任駐印尼大使嘅章啟月近日應港府邀請，來港訪問，尋日仲喺中文大學嘅中國外交政策以及中國同東盟嘅關係研討會上主講，講到派赴印尼工作時，章啟月仲主動透露自己都曾經有誤解。
中大校長沈祖堯仲代學生向佢發問，如點樣至可以成為成功嘅外交家等，章啟月好客氣話，自己冇乜成功秘訣，不過希望大家可以放眼世界，認識鄰國國情，加上努力工作，唔好故步自封，咁每個人都可以做代表中國嘅大使喇。尾聲時，沈祖堯都忍唔住盛讚章啟月口才了得，講成粒鐘都唔使睇「貓紙」。
講到印尼嘅工作時，佢話外界對印尼其實好多誤解，佢上任之初都誤會印尼係一個伊斯蘭國家。佢自爆，自己上任之初拜會印尼總統，由於以為係伊斯蘭國家，所以選擇着包到上頸嘅旗袍，外面再加一件外套。
點知接待佢嘅官員同佢閒談時主動建議佢除咗外套，話咁樣會更有傳統美。章啟月大為驚訝，後來先知道印尼只係大部分人信回教，而非正式嘅伊斯蘭國家，又明白咗呢個國家其實十分多元化。