德昌電機曾升8％

金融管理局前總裁任志剛舊年十月退休之後，變做職場搶手貨，到手嘅聘書有成六、七份，由金融研究到投資顧問、獨立非執董，名副其實橫跨政、商、學三界。尋日，上市公司德昌電機又委任佢做獨立非執行董事，任命公布之後，德昌電機嘅股價就逆市上升，最高升咗百分之八，收市都仲升百分之三點三一，睇嚟，任總唔單止有點公司成金嘅本事，搵工速度仲可以表演拋飯碗絕技添。

啱啱退休時，任總曾經話要學點hea，依家睇嚟，佢唔單止冇得hea，仲要度時間交人添。德昌電機尋日嘅通告表示，佢呢個月三十號就上任，任期兩年，份通告仲透明度十足，將任總嘅待遇全面曝光，如每年可以袋董事袍金兩萬美元（約十六萬港元），工作內容係參加兩次董事局全體會議，之後每參加多一次會議，就可以多五千美元額外袍金，真正多勞多得。除咗袍金之外，佢每年仲可以得到相當於六千美元嘅德昌股份。

四圍開會好難Hea

以任總嘅身價，呢啲條件梗係唔算好吸引，不過，任總家吓學術界同商界兩忙，隨便數吓，就有一大串工作等住佢做，譬如中國金融學會執行副會長、中大全球經濟與金融研究所傑出研究員，仲有江湖地位十足嘅中國投資有限公司嘅諮詢委員；商務方面，佢又要做建設銀行獨立非執董，加上鼎鼎大名嘅瑞士銀行非執董，依家又接埋德昌電機嘅聘書，俗語都有謂山大斬埋有柴喇。更何況，呢啲工作嘅分量同江湖地位，遠遠唔止金錢能夠反映嘅。

做公司董事雖然每年只係開幾次會，但一陣要飛歐洲、一陣又要飛北京，即使喺香港返工，都要呢度騰、嗰度撲，任總想hea真係冇咁易！