政府二○○○年開始推行強制性公積金計劃，轉眼已經十年，都係時候檢討吓嘞。政府日前舉行強積金十周年紀念活動，一班高官自吹自擂，講到現行制度天上有、地下無，直情係打工仔嘅救命恩人。

之不過，市民嘅反應就啱啱相反。日前有民調顯示，六成受訪者認為現行強積金制度無助減少對退休生活嘅憂慮，另外有四成人贊成取消強積金，八成人贊成設立全民退休保障計劃。

因乜事市民意見多多嘅呢？正如有學者話齋，過去十年強積金回報率偏低，行政費就比歐美各國高幾倍。唉，打工仔將啲錢投入去，等於掟入鹹水海，唔怪之得咁多人對強積金失晒信心啦。

講開又講，政府推行強積金制度，根本係虛應故事，唔係真心幫打工仔。香港嘅強積金制度話就話係學新加坡，可惜學啲唔學啲，人哋新加坡嘅中央公積金有政府做後盾，年回報率保證有百分之五以上，唔夠就由政府包底，無論市場點樣波動，公積金都只會愈滾愈大。但係睇番香港，政府唔單止唔包底，仲唔監唔管，強積金運作透明度低，年年都話蝕本，舊錢愈嚟愈縮水。

其實，現時香港嘅強積金制度根本幫唔到低下階層打工仔，佢哋每個月賺嗰幾千蚊，打一世工都儲唔到幾多錢，點夠養老呀！

最弊嘅係，佢哋仲要受層層剝削。嗱，尋日有班食環署外判清潔工去金鐘政府合署請願，抗議承辦商拖欠佢哋嘅遣散費。另外有班連鎖便利店員工亦係好，又拉橫額又叫口號，原來資方以外判方式經營熟食檔，但係承辦商忽然失蹤，拖欠百幾個工人三百幾萬人工同遣散費，班工人日捱夜捱，家陣分文收唔到，唔就假啦。

工人生活已經咁苦，仲要畀奸商呃，你話嬲唔嬲？難怪近日社會出現仇富情緒。不過話講番轉頭，奸商只係少數，大多數商人都係老老實實做生意嘅。所以商界大吐苦水，話佢哋交咗咁多稅，政府取之於商冇用之於民，令佢哋無端端食死貓。

回歸以來，基層市民一直埋怨政府孤寒成性，家陣連商界都鬧埋一份，政府唔通一啲都唔驚嘅咩？

講番強積金嗰筆，事實證明，現行制度根本係形同虛設，退休打工仔惟有望天打卦。如果政府仲係關人個關，攬住舊錢乜都唔做，真係會變成全民公敵o架。叮！