普通人的十九歲，可能仍是學生哥，但鄧詠琪十九歲已加入父親的皮草廠。太子女上場，你以為她做CEO？其實她只是普通員工。第一日上班，同事對她特別拘謹。她反而更努力踏出第一步，多問多觀察，由門外漢搖身一變成為皮草廠大家姐。
「人哋知我係老闆個女，唔敢點我做嘢，我要做嘅就係行出第一步，主動打開話題。」鄧詠琪（Vicky）當自己是普通員工，亦無擺款，沒有發號施令，而是虛心學習，不恥下問，「爹哋無為我安排私人顧問，佢話人哋無義務教我，要我諗辦法去學、去試。」
朝九晚十二好榜樣
沒有父親關照，她不埋怨，而是把握時機向做衫師傅偷師，觀察同事工作技巧，短時期內學識畫紙樣、揀布料、見客，與同事一起做粗重工夫。她說：「做一件皮草大褸，袖口要用幾多塊皮，其實要識至有得同客商量，但唔可以叫剪裁師傅企喺度教你，惟有見師傅同熟客傾緊衫嗰時，我喺隔籬偷吓師。遇着師傅心情好，就問多兩句！」沒有設計底子惟有惡補，她從時裝雜誌偷師，了解時裝趨勢。其後，父親派她到丹麥、芬蘭皮草拍賣場競投皮草原材料，順利完成任務。
可是勤力卻帶來壓力。畢竟她是皮草廠太子女，自我要求也隨年月增加，她說：「呢個係屋企生意，我真係唔敢懶，仲要做得比其他人落力，朝九晚十二都試過。」就這樣，做了十九年，終成大器，成為不折不扣的「大家姐」。
提拔皮草時裝新血
「大家姐」約十年前，在父親鼓勵下兩度成為香港皮毛業協會青委會主席，成為推動皮草業新力量的「大家姐」！她搞過皮草設計比賽，教授不少時裝設計系、紡織及製衣系學生設計及製作皮草心得，並發現有不少可造之材，她說：「學生好有創意，但太過天馬行空，未顧及用料限制，一件衫如果用太多種布，會推高成本，我會同佢哋解釋番咁樣行唔通。」在行內打滾近二十年，她希望多些生力軍加入皮草界。
現時，Vicky的弟弟和妹妹也加入公司，問Vicky何時做真正老闆？她耍手擰頭說自己不是女強人：「間公司遲啲畀晒細佬做啦！男仔吖嘛！哈哈！」
鄧詠琪Profile
年齡：38歲
職業：皮草廠總監
興趣：騎馬、游水、戶外活動
曾出任：香港皮毛業協會青委會主席