Thomas尋日以香港冰球訓練學校創辦人兼主席身份，出席雙方簽約儀式，中國冰球協會秘書長于天德同多位球員拉隊出席，就連Thomas嘅好友、田北俊囝囝田启文都現身撐場。田启文逗留咗一陣就趕住返公司做嘢，佢話自己喺美國讀中學時打過幾年冰球，但技術就好業餘，唔及Thomas打得咁認真。前幾年Thomas發起香港冰球訓練學校，佢一於做埋董事會成員撐兄弟。

下禮拜五喺香港舉行嘅國際業餘冰球邀請賽，Thomas都會披甲上陣，佢仲講笑咁話最近工作太忙，冇乜時間操練，惟有到時靠隊員嘅默契啦。

講起同中國女冰嘅淵源，Thomas話有次喺網上見到一篇講述佢哋刻苦訓練嘅報道，令佢好感動，湧起掏腰包贊助嘅念頭。佢希望今次贊助資金可以幫佢哋聘請國際級教練、發放訓練津貼同重要比賽獎金，希望佢哋喺嚟緊嘅冬季奧運會為國爭光！