第一係白鴿黨檢討過○三至○八年四次區會同立會選舉結果後，發現佢哋有派過人參選嘅區會選區，即使輸咗，該黨喺該區嘅立會選舉得票亦有增加。第二係根據泛民嘅區選協調機制，某黨候選人只要喺某區攞到三成票，來屆就會擁有喺該區參選嘅優先權，因此即使明知今屆輸梗，都應該派人參選霸定下屆個位。第三係二○一二年立法會將新增五席「超級區議會議席」，參選人必須係現任民選區議員，黨內多啲人參選，將來揀人出戰「超級議席」都靈活同機動得多啦。

為攞到盡，白鴿黨將改為大包圍參選，游說黨內立會議員同大佬「降格」選區會，包括已棄選區會多年嘅單仲偕、涂謹申同李華明。亦可能不計本身輸贏，轉區挑戰啲建制派嘅星級區議員，谷起選情，幫黨內第二梯隊抬轎鋪路，亦為自己參選來屆立會造勢。

不過，呢批立會議員同大佬一旦勝出，能否兼顧兩級議會嘅職務呢？會否成日要遲到早退甚至唔開會呢？