浸大尋日頒授榮譽院士，社聯主席陳智思嘅爸爸、中國僑聯副主席陳有慶喺校董會主席王英偉「扑頭」下，正式成為該校嘅榮譽院士，陳智思同媽媽陳沈時芬、大哥陳智文伉儷同姪女齊齊到場，見證爸爸嘅光榮一刻。
對於爸爸得到呢個榮耀，陳智思話好開心，但就笑言未決定點慶祝喎。陳有慶話自己同浸大好有淵源，自九三年起已開始資助該校發展，過去雖然攞過其他榮譽學位，但都唔夠呢個嚟得親切，仲講笑咁話希望自己仲有多啲機會貢獻社會。
尋日亦係浸大校長陳新滋履新後首個開學禮，佢喺七月上任時曾出過副上聯，揚言接得最好嘅人可同佢共進晚餐。佢尋日就自爆有四十幾個人參加比賽，畀咗文學院教授點評後，覺得大家都寫得咁好，故決定皆大歡喜，月底請晒佢哋去校長宿舍擦餐勁。不過，聽講報名嘅都係同事居多，浸大嘅同學要主動啲噃！