其實，大舊今次係跟立法會經濟事務委員會到莫斯科，由於大會行程只得三日，撇除來回共十八粒鐘嘅機程，計計埋埋其實只係得一日半時間留喺當地。一直炮轟政府漠視民生嘅大舊，出埠都不忘留意當地民情。佢話喺莫斯科主動同啲年輕人傾過，發現一個讀飽書嘅老師每月薪金竟然只得港幣四千蚊，但當地物價卻奇高，慨嘆俄國貧富懸殊嘅問題比香港有過之而無不及。

大舊又話自己作為一個「社會民主主義者」，覺得俄國大革命呢段歷史好浪漫，所以去莫斯科嘅紅場參觀時，唔多唔少都有啲「朝聖」嘅感覺，但就大呻三日旅程唔夠喉，希望有機會重返故地。