許曉暉本來同其他副局政助依家喺上海訪問，佢提前返港，尋日一落機就趕去簡介會，為五歲嘅乖女攞定資料，仲話佢嘅心情同其他家長一樣，都係想個女入到好學校，所以都安排咗個女學畫畫、彈琴同埋書法。至於一個月用幾多錢培訓個女，佢就耍手擰頭唔肯講，仲不停hard sell話政府好多文娛康樂活動都唔使錢，即使要收費都好平，好似歷史博物館、鐵路博物館等，都好適合家長帶子女去參觀。佢仲話唔係只揀直資學校，個女都會參加統一派位。

珊珊就話個女運動方面應該冇問題，因為除咗佢哋兩公婆嘅強項風帆之外，個女仲識游水、划艇、獨木舟，連彈琴、跳舞、音樂都樣樣精，可以話係文武雙全。

聖保羅男女中學附屬小學校長李端儀話，年年都有唔少名人嘅仔女入讀，但佢哋唔會有優待，學校會一視同仁，睇番個小朋友適唔適合入嚟讀。