八國聯軍僅凍薪惹眾怒

呢支八國聯軍表現劣評如潮兼屢爆醜聞，政府最近公布中期檢討結果，竟然唔使減薪或炒魷，而只係全部凍薪，旋即又以公帑變相集體遊埠，行程安排亦唔見得同香港好有密切關係，咁嘅「騎呢」外訪當然畀市民鬧爆啦！

果然，呢次騎呢訪滬真係好騎呢！可能政府諗住靠呢次外訪幫班八國聯軍洗吓底，搵特首辦主任譚志源做團長帶呢班鴨仔團外訪，藉此宣傳吓呢支認知度低到貼地嘅八國聯軍係存在嘅，但係事與願違噃。

首先鴨仔團喺禮拜一出發當日已經冇乜聲氣，跟住呢兩日仲無影無蹤，好似全體消失咁。卒之，喺前晚深夜新聞處先發咗十幾張相，用圖片說明簡介佢哋去過邊，原來去過上海洋山深水港，又睇過當地啲社區中心、欣賞當地居民喺中心內練習舞蹈，以及參觀過由舊廠房活化而成嘅創意產業園區、了解上海市規劃，仲同國務院港澳辦副主任華健會面等等。

明日黃花浪費宣傳機會

由於呢批相發得太遲，尋日報章冇報道到，有個別電子傳媒搵番譚志源跟進，都只係問番幾句同華健傾過乜。

其實政府推遲公布都有前科，例如俄羅斯早前發生山林大火，新聞處遲至八月十號凌晨一點四十一分先至發出俄羅斯黃色旅遊警示。點解政府今次咁遲先發相呢？究竟當中係邊個部門或者邊個環節出錯呢？呢個暫且唔提，但相信連譚志源在內嘅鴨仔團都覺得呢次訪滬係一個大好嘅宣傳機會，但依家變咗隔夜新聞，全部變晒明日黃花啦！仲邊有宣傳價值？

唔通連政府都覺得呢隊民望低落嘅八國聯軍可有可冇？如果係咁諗嘅話，政府就應該順應民意，唔好再嘥公帑留佢哋喺度，炒晒佢哋啦！