講起生促局，各位一定耳熟能詳，舊年年底，審計署嘅審計報告就踢爆佢哋大花筒兼夾濫派花紅。生促局畀人捉住痛腳，惟有死死氣認衰，仲話會深刻檢討，制訂改善措施咁話。點知話口未完，又被踢爆亂fing公帑。

生促局理事會日前開會，話過去一年有將近二千六百萬元盈餘，業績比上年理想，所以決定攞五百萬元出嚟，為三百多個員工派發花紅，局方仲制訂咗一個肥上瘦下嘅薪酬調整方案，為員工加人工，高層加多啲，低層加少啲。

如果局方真係管理有方，扭虧為盈賺大錢，派吓花紅又無可厚非嘅。不過，政府每年資助生促局二億元，即係話生促局部分營運費來自公帑，點界定有冇賺錢呀？難怪有人質疑局方濫派花紅，係慷納稅人之慨。

其實所謂賺錢派花紅只不過係藉口咋。係人都知道，生促局成立以來，經常蝕到阿媽都唔認得，佢哋咪又係照樣亂使公帑。遠嘅唔講，舊年就畀審計署踢爆十二宗罪，包括行政紊亂、遺失物資、亂發花紅、允許職員享受雙重房屋津貼等等。以遺失物資為例，局內有八千幾件器材離奇失蹤，包括電腦、視聽器材以及實驗室設備等等，總金額五千幾萬元。如果係私人機構，一早就報咗警，但係局方根本唔當回事，連調查報告都慳埋。你話係咪超級大花筒呀？

講得冇錯，生促局患咗一種叫做大花筒綜合症嘅怪病，一日唔亂fing公帑，就周身唔聚財。更弊嘅係，大花筒綜合症係一種烈性傳染病，傳染性仲犀利過沙士同禽流感，尤其喺公營機構當中蔓延得最快，無他嘅，公營機構無王管，疫情咪乘虛而入囉。

唔怪之得近年公營機構是非多多啦，呢，應科院豪掟公帑請風水佬睇風水，旅發局用公帑幫高層買超豪醫療保險，平機會前主席外出公幹入住酒店大使套房，真係鑊鑊新鮮鑊鑊甘。俗語話，病向淺中醫，可惜政府唔監唔管，令公營機構病入膏肓，就算華佗再世都救唔番啦。

叮佢個鎯鎯！呢啲公營機構正經事唔做，一味亂fing納稅人嘅錢，早就神憎鬼厭，今時今日更係眾望所歸，冇得留低。叮！