本文重點
香港鐘表展尋日登場，主辦單位尋晚喺會展舉辦交流酒會，數以百計中外業內翹楚現身。香港鐘錶業總會主席Joseph朱繼陶話，今年佢哋特登喺場內展示六隻瑞士頂級名牌手錶，以便帶挈參展商提升設計工藝，當中最貴嘅係價值九百幾萬元嘅伯爵錶，令展場增添唔少貴氣。
險待慢瑞士鐘錶業聯會主席
香港鐘錶業論出口數量已係全球No.1，論貨值就僅次於瑞士，尋晚瑞士鐘錶業聯會主席Jean-Daniel Pasche亦遠道前來支持香港同業。但主辦單位冇特別招呼呢位貴賓，酒會結束後Joseph發現幾乎待慢咗呢位客人，自掏腰包請阿Jean去米芝蓮食肆滿福樓食廣東菜，仲急Call老婆同太子珠寶主席鄧鉅明作伴。
現場靚錶令人睇到眼花繚亂，香港鐘錶業總會副主席張繼東戴咗隻滿布閃鑽嘅潮爆腕錶。隻錶係佢嘅自創品牌Alan & Anthony出品，價值約五萬元，佢專做中東生意，所以唔怕喺香港同人撞錶。
轉頭見到飛騰錶業太子爺Gary劉燊濤，咁啱中東又係佢哋嘅主要市場。佢笑稱，中東女人成日由頭包到落腳，唯一可以展示嘅係雙手，所以佢哋好鍾意搶眼嘅鑽石手錶。尋晚佢戴住自家品牌Jean d'Eve嘅飛返系列經典腕錶，當時間去到十二點時，時針同埋秒針會飛返去原點，夠晒玩嘢。