南區區議會薄扶林選區補選前晚結束，公文袋司馬文砌低匯賢智庫葉劉淑儀徒弟劉應東。葉劉失去薄扶林地盤，改寫該區二十年嚟由建制派主導嘅歷史，民主派同建制派即刻進行選後數據分析，睇吓對明年區議會選舉有乜啟示。
白鴿黨認為劉應東嘅得票，較同屬匯賢智庫嘅前任議員陳岳鵬喺○七年時跌近兩成半，反映「葉劉效應」已逐漸消退，無法延續○八年立法會選舉建制派「吸票機」嘅聲勢。其次，公文袋經歷「五區公投」後嘅低潮，之後支持度似有回穩迹象，某程度印證咗中大同港大最近民調情況。
但建仔高層就話睇番○八年立法會選舉嘅戰果，當時葉劉喺薄扶林區嘅得票同劉應東相若，而當時公文袋同白鴿黨嘅總票數，正好又同司馬文得票差唔多，顯示前日補選只係○八年形勢嘅延續，加上劉應東空降參選同陳岳鵬中途離場等負面因素，選舉結果屬正常，並唔令人意外。
呢一役被外界視為葉劉一二年立法會選舉轉戰區議會「超級議席」試水溫之作，佢不但南區地盤失陷，兼賠上議席同聲勢，可謂損兵折將，對爭逐「超級議席」，無論喺實際戰略同心理因素，都會打折扣。