07/09/2010

播放本新聞相關短片

政情:黃金寶邊備戰亞運邊讀教院

「單車王子」黃金寶決定重返校園,即將入讀香港教育學院嘅學士課程,但三十七歲嘅阿寶依家仲為緊廣州亞運努力,要一邊練車、一邊讀書,真係要靠超人毅力。

其實早喺今年一月,阿寶已獲得教院頒發榮譽院士學位,表揚呢位亞洲車神對運動同社會所作出嘅貢獻。諗唔到依家阿寶同教院又結緣,成功申請入讀該校嘅健康教育榮譽學士課程,進一步upgrade自己,呢份永遠追求進步嘅精神,真係好值得年輕人學習。

同阿寶一齊進修嘅,仲有另一位香港單車代表郭灝霆,佢哋兩個聽日將出席開學禮同傳媒會面,分享心情。同日,教院校長張炳良亦會聯同教職員一齊出席開學禮,介紹今年獲政府資助開辦嘅教育相關本科、哲學碩士同哲學博士課程。

教院校園位於大埔郊外,自成一角,咁啱阿寶又經常同香港隊「踩」入大埔大美督、新娘潭一帶訓練,睇嚟日後佢大可寓返學於練車嘞!

Money18 新功能「18好路數」為你預測心水股票升跌機會率