港協暨奧委會喺六月交咗申辦二○二三年亞運會嘅意向書之後，一直都冇聲冇氣。特區政府尋日宣布成立有成三十人嘅二○二三年亞運會臨時申辦委員會，除咗唔少係港協暨奧委會骨幹外，仲有嚟自商界以及唔同團體嘅人。我哋細閱名單發現，胡法光同胡曉明兩父子竟然同時成為委員，都算係近年罕見。
臨時申亞委員會主席係民政事務局局長曾德成，身為港協暨奧委會會長嘅霍震霆做委員會副主席，而八位包括胡法光在內嘅港協暨奧委會副會長，仲有港協暨奧委會義務秘書長彭冲，亦同時成為臨時申亞委員會嘅委員。
雖然胡法光公子胡曉明唔係港協暨奧委會骨幹，但就係大型體育活動事務委員會主席，照咁睇都係同申辦亞運有關。見到胡法光父子兵上陣，唔知有三個仔嘅霍公子有冇心癢癢，帶其中一個仔入委員會呢？
聽聞委員會將於九月底至十一月頭諮詢公眾對申辦亞運嘅睇法，委員會三十幾人人多手腳亂，有部分委員話仲未知運作起嚟點樣分工。