對樹仁大學校監胡鴻烈同校長鍾期榮嚟講，今年係好特別嘅一年，事關係佢哋九十歲大壽兼六十五周年藍鑽石婚誌，又係胡鴻烈成為執業大狀嘅五十五周年，所以兩老趁機將兩人舊嘅法律著作重新出版，尋日仲一齊出席新書發布會添！
胡校監話喺五十年代時，有感本地法律知識唔普及，又畀英文壟斷，所以就同太太寫成《香港婚姻與繼承法》同《人權與國籍》兩書，希望鼓勵有更多有質素嘅中文法律創作，好開心今年又可以再重新出版。
現場仲見到嚟攞簽名嘅律師會會長王桂壎，原來佢八十年代都喺樹仁灣仔舊校執過教鞭，仲話當時係鍾期榮親自請佢添！佢憶述當時樹仁環境未係好好，鍾期榮請佢嘅聘書亦冇寫明薪金，但佢對教書好有熱誠，所以即時一口應承冇扭擰。佢又話自己都喺其他大學嘅法律學院教過書，不過始終對樹仁學生有情意結，覺得佢哋上進得嚟又謙虛喎！