立法會議員「袋巾傑」梁家傑離開香港成半個多月，尋日喺facebook上載咗一輯相，先至知道佢去咗英國放暑假。不過相中只有袋巾傑一人，唔見佢太太同仔女蹤影，原來呢次兩公婆帶一對孖仔去英國開學，梁太因為唔捨得啲仔女而泣不成聲，所以佢唔想喺facebook畀人見到。
袋巾傑嘅大女四年前開始喺英國讀書，今年十六歲嘅孖仔又分別考到喺蘇格蘭同威爾斯讀中六，所以兩公婆就陪兩個囝囝去開學，順道放假。三個仔女都放洋，袋巾傑話太太喺英國全程都喊，連自己都有啲情緒反應，覺得好似人生一個階段嘅結束咁，返港之後屋企得番兩公婆都有啲唔慣。
不過，佢好快就要收拾心情，事關立法會由今個月開始陸續有會要開。佢老婆就做緊義工，搞同公平貿易有關嘅嘢，十月空閒或飛去英國探仔喎！