生存空間飽受威脅

白鴿黨喺「五區公投」同政改一役，除咗同公文袋、社民連全面決裂外，仲令到好多支持開泛民主派嘅民間團體不滿，後來仲出現嫌隙，其中導火線就係七一遊行。

話說喺政改方案通過後，白鴿黨明知會面臨社民連同大批反對人士狙擊，都堅持參與七一遊行，令遊行嘅焦點落晒去白鴿黨同有關狙擊行動身上，其他同政改無關嘅民間團體訴求幾乎完全被蓋過，令佢哋更加氣憤。

最重要嘅係，為免當日真係會爆發暴力衝突影響自身安全，好多以往有行開七一嘅市民今次都打咗退堂鼓，令遊行人數大減，民間團體喺遊行期間收到嘅捐款數字亦自然大跌。須知七一籌款係唔少中小型民間團體嘅主要財政來源，喺某啲多人上街嘅年份，隨時一次就可以籌足全年嘅營運開支。今次有啲團體只籌得數千甚至數百蚊捐款，直接威脅佢哋生存空間，想唔嬲白鴿黨都幾難。

白鴿黨同民間團體反枱決裂嘅導火線，係遊行結束後嘅一次民陣會議。原來所有喺七一期間籌款嘅政黨同團體，都事先協議咗將籌到嘅十分一捐款，上繳畀主辦單位民陣作為來年經費。今次籌款數字插水式下跌，有個別團體提出能否豁免上繳，點知畀白鴿黨嘅代表一口拒絕，堅持所有團體不論籌款多寡都要如實交數，令嗰啲團體火上加油，甚至聲言以後都唔會幫白鴿黨拉票。

公社兩黨豬籠入水

有白鴿黨中人就抱怨，該黨嘅籌款街站喺七一當日屢遭圍剿，籌得款項由過往嘅十多至數十萬元，急跌至只得四萬幾蚊，係人數下跌嘅其中一個受害者。再者，雖然今次遊行嘅整體籌款額大跌，但力撐「公投」嘅公社兩黨卻豬籠入水，可見啲民間團體嘅捐款其實係畀該兩黨吸咗。

白鴿黨將主動聯繫各個民間團體修補關係，但最終能否成功，真係冇人話得準。