未聽過呢個職位？嗱，件事係咁嘅。港府○八年喺受資助福利機構開設咗三千個活動工作員臨時職位，協助機構行政工作，同負責組織康體娛樂活動等。計劃為期三年，一方面可以紓緩愈來愈嚴重嘅青少年失業問題，同時亦可以解決因為一筆過撥款，社福機構冇額外資源增聘人手嘅矛盾。

一舉兩得本來係好事，但問題嚟嘞。計劃仲有半年就完結，但當局對於三千個職位保留定係取消，家陣都未能確定。唉，班薪高糧準嘅官員就話唔使憂啫，呢班後生學歷有限，重返校園唔可能，又冇工作經驗，隨時冇咗飯碗，食完今餐唔知有冇下一餐，當局遲遲唔公布安排，唔憂就假！

有參與計劃嘅人士好不滿話：「我哋不斷爭取，政府都係Hea我哋，一啲都唔重視。」又話：「政府畀咗個平台我之後，依家又要拆走。」鬧得冇錯，當年失業率高企，港府為咗做場「撐就業」騷而推出計劃，家陣經濟好轉，失業率稍稍回落，當局又開始諗縮數，根本係打完齋唔要和尚。

叮！雖然本港最新失業率回落到百分之四點三，但就業增加只係表象，十五至二十四歲青少年嘅失業率仍然高達百分之十三點二，形勢不容樂觀。如果當局唔妥善安排，到時失業大軍突然激增三千個，數字更加難睇！

除咗活動工作員被玩殘，社福機構亦受無妄之災。到時一下走咗幾千人，去邊度搵人做嘢？如果要其他社工頂上，工作量倍增，一定影響士氣。再講，活動工作員做慣做熟，佢哋離職後，好多活動亦只能跟住被削減甚至取消，參與嘅市民同樣受影響。唔怪得有工會團體開到聲，下月初會遊行到政府總部，表達強烈不滿咯。

講真，港府協助青少年就業從來冇長遠規劃，由老懵董時代嘅活動助理同朋輩輔導員職位，到後來嘅青年大使，再到家陣嘅活動工作員，鋪鋪都係見步行步，最終唔湯唔水收場。

查實，社福界一直都爭取將活動工作者呢類臨時職位納入常設編制，長期聘用，但當局一於闊佬懶理。家陣左三年、右三年，三年有、三年冇，社福機構無法做長遠規劃，參與嘅青少年又睇唔到前途，愈做愈心淡，市民更得唔到高質素嘅服務。計太一叮話齋，咁無厘頭嘅計劃，不如改名做「三輸計劃」罷啦！