尋日建制派繼續杯葛「城市論壇」，謝志峰不禁大呻近半年嘅論壇畀建仔搞到「跛晒腳」。台下嘅珠姐聽到當然唔高興，仲刻意表明自己係建仔黨員，足以代表建仔出席，又自爆自己逢請必到，唯獨有一次因佢掌握到啲機密資料，知道政改方案會「轉彎」，所以先唔嚟。乜嘢機密資料？珠姐講緊嘅係立法會表決前形勢突變嘅政改區議會方案。

咁又係嘅，佢呢頭至講緊個方法一山藏六虎，所以唔理想，嗰頭各方又已經傾掂數，要佢忽然轉軚支持方案實在難為咗佢，所以佢被迫甩底亦情有可原。

發展局局長林鄭月娥都話多年嚟都有出席呢個節目，淨係做庫務局常秘時都嚟過三次，○三年做社署署長時又嚟過講沙士，但最惹火嗰次無疑就係傾皇后碼頭嗰次嘞。

尋日論壇討論言論自由，廣播處長誓神劈願咁話編輯自主好似佢條命咁重要喎。