06/09/2010

播放本新聞相關短片

政情:雲維熹誕囡囡心情靚

日前喺一個活動度撞到香港汽車會會長Wesley雲維熹,見佢心情輕鬆愉快,原來佢同女友嘅愛情結晶啱啱喺上禮拜一出世,BB女叫Cloudia。

一講起Cloudia,Wesley嘴角即時掀起微笑,佢話BB女喺八月三十號出生,佢親自入產房支持女友,仲係第一個抱BB嘅人。佢大讚BB女好得意,暫時未改中文名,但會按族譜排「天」字輩。

Wesley同車有緣係人都知,細個玩玩具車,大個玩跑車。當日見佢皮帶扣係軚盤圖案,睇真啲,原來連袖口鈕都係軚盤,相當有個人風格。佢話袖口鈕係朋友幾年前送畀佢做生日禮物,後尾佢去行Dunhill,見到有同款皮帶扣,二話不說即買埋襯埋一套。