富貴黨前主席田北俊喺報章批評政府「孤寒成性」嘅言論引起極大回響，有人質疑田少嘅建議唔可行，更有指佢咁做係想幫細佬田北辰入立法會鋪路。事件疑似受益人田二少尋日就開腔幫大佬解畫，話外界斷章取義，扭曲咗田少嘅意思，仲力指依家商界同市民普遍都支持田少嘅言論添！
田少早前公開承認佢發表該篇文章係有政治目的，田二少尋日就話大佬只係「衝口而出」，相信大佬唔係為咗送佢入立法會先至咁樣做。田二少又話依家市民對商界有負面睇法，該黨有必要出嚟表態，為商界做嘢，但承認今次黨內就事件嘅溝通「確係缺乏咗啲」。
對於喺富貴黨「中途出家」嘅經濟動力議員林健鋒，日前公開質疑田少要求政府動用外匯儲備扶貧嘅建議唔可行，田二少即動肝火，話一啲唔支持佢哋嘅人，定會趁機斷章取義：「佢（田少）從冇講過話要郁啲儲備，只係話可以用筆儲備生出嚟嘅利息啫，佢咁講太誇張！」
鬍鬚曾尋晚回應話，過去三年，用喺扶貧嘅支出多咗三成，又話財政儲備有五千幾億，應該可以解決經常性嘅問題。