馬季尋日正式開鑼，馬迷「餓馬」多時，尋日爭入沙田馬場攞頭彩，連稀客新世界發展董事總經理鄭家純都嚟湊熱鬧，為愛駒「奪寶」打氣。「奪寶」賽前狀態神勇，純官當然唔想錯失拉頭馬機會啦，可惜「奪寶」僅跑第三，純官走時顯得有啲失望，但佢表現出大將風度話：「（隻馬）表現都ok，跑馬唔係講輸贏嘅。」首個賽馬日就開齋袋錢，成績算唔錯喇。
廠商會副會長施榮懷家族旗下嘅「愛拼者贏」就以大熱姿態脫穎而出，捧走二十八萬五千元獎金。攞到頭彩，施生好興奮咁豎起拇指話：「最緊要係旗開得勝！」夜晚則同家人食飯慶祝。
新馬季將有唔少新馬亮相，馬會大董兼馬主利子厚話愛駒「擦出火」已積極操練，就快登場。齋聽「擦出火」個名，戰意好濃喎，名字由來原來源於一餐飯。話說利子厚有次同朋友食西餐，講起為新馬改名，見到枱上有一種名叫Tatuffo嘅黑菌，靈機一觸用「Tatuffo」做馬名，然後取其中文諧音「擦出火」。
前全國政協常委張永珍都絞盡腦汁為新馬改名，最後扑錘用「頭等艙」。莫非佢好鍾意坐頭等？非也！原來頭等艙有最頭最前嘅意思，希望愛駒跑得快過人，贏多啲頭馬喎。
轉頭撞見已卸任嘅馬會前主席陳祖澤，佢對馬圈不離不棄，入場行番轉。問佢落注會唔會比做主席時更豪氣，佢就笑住快步走，似乎唔想搶新主席施文信風頭。