關乎議員口福同健康，試食兵團人選絕唔能夠求其，最好八黨都有代表，唔得嘅話，漁農界「肥根」黃容根同飲食界「肥仔張」張宇人亦應列入當然委員，以佢哋嘅「重量級」身形，唔食得都睇得嘛。

肥根話揀選餐廳首重健康，菜餸最緊要食材新鮮同易消化，仲話最好用走地雞，咁先至味道同營養兼備喎。保險界陳健波就話議員平日冇時間做運動，餐廳煮法首要清淡為主，少肉、少油、少鹽，兼多菜、多魚，咁就very good嘞。

肥仔張就唔係咁睇，直言健康煮法，出品通常冇咁好食，少鹽少油，全部白烚，搵鬼幫襯咩，於是呼籲同僚放業界一條生路。但佢表明唔會加入試食兵團，事關投標者個個都係選民，無謂順得哥情失嫂意。

據聞，雖然肥仔張冇落手落腳揀餐廳，但都有畀意見，例如建議喺宴會廳設魚池，等議員有海鮮送飯，而餐廳出菜嘅位置同收碟嘅入口要分開，咁先夠衞生。