欣賞胡志強贈送土產

佢喺網誌內大談點樣同台灣方面互相送禮，但只係選擇性提及台中市市長胡志強，話胡志強送佢幾袋土產，有太陽餅、鳳梨酥，仲有鹿港特產豬油「米老」；又話一次宴會中，主人家安排咗一道「海派挫冰」，足足有半張枱咁大。鬍鬚曾對呢啲禮物嘅欣賞之情，字裏行間表露無遺。

同樣係禮品，但佢參觀誠品書店時，書店董事長吳清友送畀佢老婆嘅一盒疑似茶葉嘅紀念品就冇咁好彩，得唔到鬍鬚曾厚愛可以化為文字留下紀錄，摷勻全篇網誌，都搵唔到相關嘅一粒字。

鬍鬚曾擺明係選擇性失憶。梗係啦，嗰次佢老婆喺吳董致辭時半途走咗去，搞到要商務及經濟發展局局長劉吳惠蘭代為上台接收禮品，佢老婆間接出醜人前咁失禮，仲敢提咩！惟有當唔記得啦。

噏錯住好D老闆個名

佢喺網誌亦花咗唔少筆墨交代自己喺台灣送出嘅手信，特別提到帶咗本地設計師陳幼堅嘅茶具去做見面禮，又話「『住好D』創辦人楊學德亦提供不少好東西」，有銅片金魚掛飾、酒塞同「雙喜」書籤咁。

「住好D」（G.O.D.）係本地著名創意家居用品品牌，創辦人係楊志超，兩年前佢因為「拾肆K」字樣T恤風波而一度人氣高企，而楊學德係本地漫畫家，鬍鬚曾將兩個人嘅身份crossover，都相當夠創意囉！

鬍鬚曾依家身處北京，而跟大隊訪問上海嘅政治助理葉根銓將所有責任攬晒上身，回覆話鬍鬚曾同楊志超係朋友，網誌首稿冇寫錯楊嘅名，係職員手民之誤喎。