根據廿蚊張所講，全港十九萬五千個食肆從業員裏面，有三分一即大約六萬二千人時薪低過廿八蚊，最低工資法例實施後需要集體加薪，小型食肆好可能頂唔住，而大型食肆亦可能要裁減人手同將部分工序北移。

食肆係咪死得就唔知，但如果最低時薪連廿八蚊都冇，咁就真係瓜得。聽吓勞工界又點講吖喇，佢哋認為廿八蚊時薪好難養家，所以堅持最低工資三十三蚊。公說公有理，婆說婆有理，勞資雙方討價還價，睇嚟呢場最低工資爭議仲有排拗。

話時話，今時今日，地皮賣到萬幾二萬蚊呎，豪宅更加係屢創癲價，但仲有六萬幾食肆員工時薪低過廿八蚊，真係諗起都心噏。香港地百物騰貴，通脹猛虎又殺埋嚟，衣食住行樣樣加價，咁低人工顧得到邊樣？正所謂「賣花姑娘插竹葉」，食肆員工為大家炮製豐富大餐，自己可能窮到要食粥水，唔心噏就假。難怪自由黨前主席田北俊亦忍唔住怒轟政府淨係識得做守財奴，漠視貧富懸殊。

不過諗深一層，香港貧富懸殊咁嚴重，就算當局肯開倉派米，都只係可以暫時止咳，根本解決唔到問題，對付貧富懸殊，治本之計始終係要推動經濟發展，尤其係要向多元化發展，咁先至有啲希望。中學教科書都話喇，產業多元發展，係香港成功嘅一大關鍵，可惜回歸後，港府除咗識得賣地，就係獨沽金融一味，搞到經濟結構畸形，基層勞工供過於求，完全冇叫價能力，想要高啲人工都幾難。

港府推動經濟不力，但吹水嘅本事就愈嚟愈強。回歸後，當局話就話要推動產業轉型，甚至仲推出乜港物港大計添，吹到天花亂墜。近年佢哋又吹水話要發展乜嘢六大優勢產業，不過吹到今時今日，十畫都未有一撇，唔使問阿貴，所謂六大產業又係假大空嘅翻版，打工仔寄望呢啲大計創造就業，同水中撈月冇咩分別。

講到底，政府儲備本來就係市民嘅血汗錢，開倉派米，扶貧紓困，固然重要，但最緊要仲係推動經濟轉型，多元發展。只要經濟繁榮，市道暢旺，老闆搵到錢，打工仔自然可以水漲船高。如果唔係，基層市民連工都冇得做，就算有最低工資，都係嘥氣，叮！