停車熄匙嘅研究因為立法會抖暑靜咗落嚟，記得暑假前，有司機疑喺車廂焗死，搞到環境局局長邱騰華騰晒，即時讓步拋出酷熱天氣下可豁免熄匙嘅建議，仲試坐「熱狗巴」體驗吓。不過，邱騰華嘅讓步等於將負責發出酷熱天氣警告嘅天文台擺咗上枱，難怪天文台長李本瀅尋日喺電台反建議，話將酷熱天氣警告同停車熄匙掛鈎，只會令情況變得複雜，反而建議倣效加拿大，根據車廂溫度執法仲好，言下之意即係話邱局長條橋唔得！
唔知係咪因為李本瀅早上嘅言論刺痛咗要害，邱騰華尋日下晝出席一個活動時，草草做完個儀式，連表演都唔睇，拋低同為主禮嘉賓嘅鄉議局主席劉皇發，急急腳走人，仲愈叫愈走，出動埋新聞官攔截記者，都幾狼狽。