香港嘉應商會前晚換屆，新任會長係福布斯富豪兼香港絲寶集團董事長梁亮勝。梁生係廣東梅縣人，但叱咤湖北商界，有湖北首富之稱。交棒畀佢嘅會長、金利來太子爺曾智明（Ricky）話，由梁生做會長，係客家人之光喎。
梁亮勝當晚同太太出席會董交接禮，前全國人大常委曾憲梓同太太都嚟恭賀佢。至於Ricky卸任後，本來可以「升呢」做永遠榮譽會長，但佢睇到商會仍有需要，連榮譽都唔要，寧願留任做第一副會長，仲話只要商會有需要，唔理喺邊個位置，佢都會全力以赴。
新會長梁亮勝呢晚好忙，佢來頭唔嘢小，第一桶金全靠做紫檀木生意賺來，八九年就將賺得嘅二百萬美元成立絲寶公司，經營洗浴用品。○九年喺福布斯中國富豪榜上，梁亮勝身家更高達三十五點八億元。