傳統直資名校拔萃男書院附屬小學尋日舉行兩場小一入學簡介會，好多家長都去捧場，前財政司司長梁錦松都唔例外。首場簡介會尋日朝早九點半開始，未到九點，已經見梁錦松同老婆伏明霞殺到，仲霸定頭位聽校長講解入學要求，睇嚟佢哋兩公婆想幫囝囝皓嘉報名入學。
阿松明知自己去到邊都無所遁形，尋日仲咁高調出席個會，事後梗係畀班記者追問係咪想送囝囝入男拔，阿松只係「哈！哈！哈！」笑咗三聲就走人。拔萃男書院校長張灼祥話，尋日見到阿松夫婦時，佢曾經問小伏囝囝游水係咪好叻，阿松當時搶住答話係。考得拔萃嘅學生，個個都有幾項專長傍身，游水叻都唔會特別有分加。
伏明霞○二年嫁畀梁錦松後，○三年生咗大女司渝，○四年尾小伏再剖腹為梁家生咗皓嘉，到○八年生埋細仔就收爐。計番條數，皓嘉今年都五歲幾，出年就要升讀小一，唔怪得兩公婆咁緊張。