徐悲鴻身為「中國近代繪畫之父」，其子徐慶平就係中國人民大學徐悲鴻藝術研究院院長，佢尋日喺香港出席一個活動時，就現身說法透露父親教佢作畫嘅秘訣在於「字如其人」、「字乃人之衣冠」，所以，佢嗌小朋友學畫之前應該先學字。
徐慶平尋日出席「2010徐悲鴻盃國際青少年兒童美術比賽（香港賽區）」，基本法委員會副主任梁愛詩都有出席呢個活動。徐慶平話，畫畫係表達情感最原始同最直接嘅方法，只要畀筆同顏色小朋友就會畫，家長唔好要求咁多，只要隨小朋友自由發揮就可以。
佢仲話，自己四歲起跟爸爸學習寫字，雖然爸爸係大師級，但從來冇畀壓力佢，只係要求好嚴格。當時徐悲鴻工作忙，兩仔爺冇得日日見，但爸爸點忙都會親自揀選字帖畀佢練字，規定每日要寫兩頁，兼且每日用紅筆親自批改，寫得靚嘅字會喺側邊打圈，最靚嘅有三個圈，冇打圈嘅就要第二日重寫。徐慶平仲話，中國書法講求線條同形狀美，小朋友學寫字就可以學識美學。徐慶平即席揮毫，寫咗幅字送畀詩姐，氹得詩姐好歡喜。