賭王何鴻燊幾房女兒係媒體寵兒。上星期二（八月三十一日），賭王四房長女超盈趁港大開學前，特登喺傍晚時分出嚟中環鬆一鬆，短短一個鐘，佢喺中環就撞到大房同三房嘅家姐，大家仲有講有笑。各房關係咁融洽，賭王認真有福氣！
今年入讀港大語文系嘅何超盈，開學前特登約埋英國同學、柯清輝契女Carmen仲有佢媽咪嚴玉麟夫人等人，喺Cafe Landmark一齊high tea，無耐，超盈同Carmen行去隔籬中建大廈嘅HMV，買咗個二千零九十九蚊嘅美國Beats by Dr.Dre Solo耳筒。
向來做事有計劃嘅超盈對去港大讀書好緊張，買完嘢就趕住返屋企為翌日開學做準備。不過，等車期間，居然又畀佢撞到大房家姐何超賢，超賢咁啱同仔女路過，兩姊妹打個招呼，超盈仲同姨甥仔嚟個good bye kiss，相當親切。過咗一陣，三房嘅超雲喺置地行完Miu Miu出嚟，一見到超盈，就笑笑口打招呼。
超雲被傳同藝人林峯拍拖，超盈幫口代家姐伸冤，澄清超雲嘅公司只係喺林峯新戲投資賣廣告，兩人唔係拍拖。超雲亦解釋話，自己只係贊助商，加上依家工作忙，根本冇時間拍拖喎，總之單身係喇！