大讚吳儀談吐清晰

政府推行擴大政治問責制後，引入咗大批薪高糧厚嘅花瓶式副局政助，經過兩年運作，呢班政壇新丁大都表現不濟、備受批評。政制及內地事務局副局長黃靜文尋日出席一個活動時大講政治人物嘅民望，仲讚賞美國前總統克林頓民望高企值得好好研究，似乎想向克林頓偷師。其實，港府官員使乜望咁遠呀？佢哋連面對市民、解釋政策都畏首畏尾咁，做好呢一步先喇。

黃靜文尋日出席青協一個公民教育活動，同班青少年真情對話，佢斬釘截鐵話自己無政治偶像，但讚克林頓「點解可以咁叻」。佢話，好多國家同地區嘅政治人物上任初期都有蜜月期，之後就民望插水，屢試不爽，佢仲點台灣總統馬英九嘅名，連香港亦走唔甩，只有克林頓可以長期維持不俗民望，即使一度受萊溫斯基性醜聞影響，民望最終都回升番。

跟住佢又講到「中國鐵娘子」、前國務院副總理吳儀，九四至九九年，黃靜文處理過亞太經合組織（APEC）嘅工作，當時做緊外經貿部長嘅吳儀談吐清晰、誠懇，面對中美貿易問題立場堅定，令佢留下深刻印象。

入職副局長後，黃靜文表現一直未見突出，估唔到佢心儀嘅兩個政治老手都係叱咤風雲嘅級數，或者佢都希望自己有呢份從政嘅能耐，只係一眾副局政助家吓嘅表現令人擰晒頭，香港人都唔知敢唔敢期望佢哋有人學到克林頓同吳儀囉。

同事頂上死撐訪滬

講番今日出發嘅副局政助上海團，黃靜文都有同行，佢話早幾個月國務院港澳辦已邀請佢哋去上海，只係雙方要夾時間，至等到依家出發；仲死撐即使成班副局政助集體消失，工作都有同事負責喎，咁即係可有可冇喇！