件事係咁嘅。十九才子喺《壹週刊》寫咗篇題為「蜻蜓群低飛的時候」嘅奇談怪論，大肆吹捧美國圍堵中國戰略，仲話希望第三次世界大戰早啲爆發，理由係「世上的瘋子、蠢材、庸人，越來越多了，不打一仗洗洗基因牌，全人類都向低智商沉淪」。

叮！身為中國人，十九才子妖言惑眾，祈求美國快啲攻打中國，為中國人「洗洗基因牌」，呢種賣國言論同李漢奸如出一轍，確實令人側目。《文匯報》作為黨嘅喉舌，呢個時候梗要企出來表吓態喇，於是便上演咗一場狗咬狗骨嘅鬧劇。

話時話，《文匯報》怒斥淫賤黎及十九才子嘅賣國言論，固然係正氣凜然，不過咁，呢班港產漢奸之所以肆無忌憚認賊作父，愈賣國愈快樂，皆因背後有人撐腰，而且唔止港英餘孽，連內地唔少官老爺都係佢哋嘅保護傘添。所以話，《文匯報》鬧還鬧，但打狗要睇主人，如果唔係，得罪咗淫賤黎事小，得罪佢背後嘅狗主事大，到時咯喎，打狗不成反而被狗咬，咁就真係唔衰攞嚟衰囉！

冇錯，十九才子確係淫賤黎豢養嘅家禽，為求主人賞賜經常發表奇談怪論，但無論點都好，家禽始終唔及淫賤黎呢隻走狗厲害。點厲害？講起就一匹布咁長。係人都知，淫賤黎係靠誨淫誨盜、反中亂港起家，佢嘅壹淫媒日日詛咒中國，叫囂「天滅中共」、「結束一黨專政」，甚至公開羞辱國家領導人係「大陸佬」、「Short short地」，擺明同共產黨勢不兩立，不共戴天。

奇就奇在，內地當局唔單止冇封殺壹淫媒呢個反共急先鋒，仲百般呵護，對壹淫媒報刊喺深圳等地賣通街隻眼開隻眼閉，甚至以銀彈相助添。呢，當年壹淫媒搞上市，本來已經山窮水盡，中資銀行及時送上大把「金丹」，中資機構更以大量廣告「銀彈」支持，令壹淫媒絕處逢生，快高長大。

更加令人難以相信嘅係，中共嘅紅色根據地江西井岡山市來港推廣旅遊，好揀唔揀，居然揀爛果報獨家落廣告。仲有，惠州市中級法院吖、湖北窗口公司吖等等，亦排住隊喺爛果報落廣告，問你服未。

事實證明，唔少內地官員表面上與反共傳媒劃清界線，實際上卻與淫賤黎暗中勾結，充當佢嘅保護傘。如果大家仲係唔信，不妨再睇吓淫賤黎旗下公司印製嘅六合彩報點樣喺內地如入無人之境。地下六合彩荼毒神州，害到唔少同胞傾家蕩產、妻離子散，連命都輸埋，而呢啲正正係走私六合彩報所造成嘅惡果。喺內地，港產六合彩報係非法刊物，如果冇內地貪官、公安甚至軍方喺暗中保護，淫賤黎嘅六合彩報有冇可能長期畀人走私北上呀？有冇可能禍害全中國呀？

堡壘最容易從內部攻破。港英餘孽及內地當局長期縱容壹淫媒，養狗為患，唔止搞到香港永無寧日，連神州大陸亦烏煙瘴氣，《文匯報》依家先至嚟扮正義，遲唔遲啲吖。計太一叮話齋，再咁落去，唔使美國攻打，中國遲早都自己變色喇。叮！