二十六歲的黃婉曼（Icy）由小記者變身「天氣女神」，旁人覺得她走運，其實她背後付出的努力是觀眾看不見的。當時她早上做《新聞透視》採訪，放工後留在公司背稿，待《晚間新聞》播出後，才輪到她出鏡兩分半鐘報天氣，每天踩足十四小時。Icy展露招牌笑容說：「新聞部要改革，我冇想過成名，只係覺得人哋對自己咁信任，一定要做好佢。」
歷起跌悟放鬆
初時觀眾對她並不受落，「我一緊張就食螺絲（講錯嘢），頭幾日觀眾鬧得好緊要。」她為此淚灑錄影廠，更自責到失眠。幸好樂天的她沒有被打沉：「有觀眾同我講，見到我報天氣後，即刻開心晒，原來我帶到開心感覺畀人。」
Icy是潮州人，在汕頭出生，父親在香港做生意，她十二歲來港入讀香島中學，年年考全級第一。「我以前係好勝，日日溫書溫到半夜三點，我一定要第一，第二我會唔開心。」她會考攞２A６B，高考３A１C，全是苦讀成果。
但她並非全無挫折，九八年她中三，父親生意失敗，舉家搬回深圳，翌年申請助學金才能繼續來港讀書。○二年，唯一的弟弟遇車禍喪生，Icy說起往事仍眼紅紅：「細佬只有十二歲，呢件事改變我好多。」她升上大學後學懂放鬆，不再執着成績：「我喺大學好頹，只會用七、八分嘅力，攞七、八分嘅成績。」
「我唔係明星」
Icy今年二月辭去新聞部工作，轉往中移動旗下雜誌做總編輯。工作機會接踵而至，做世界盃、商場show、上《獎門人》、拍廣告，稍後更會主持電視節目。她不想錯過眼前機會，但堅持自己不是明星：「拍戲唱歌嗰啲先係明星，我只會做自己做得嚟嘅嘢。我做主持會做好多資料搜集，加入專業知識，帶到資訊畀觀眾。拍廣告亦只會選擇不違心嘅，着三點式一定唔接受。」
她不會定下事業目標，當沒有事情再值得做時，便會轉行過簡單生活，但目前最想做到獨一無二。她笑道：「我唔會做花樽，人哋搵我做嘢，我希望交到貨，令人覺得一定要黃婉曼做先有效果！」
黃婉曼小檔案
年 齡：26歲
學 歷：中文大學新聞及傳播學系
現 職：旅遊雜誌《12580尚悠》總編輯、客串主持
興 趣：寫作．飲酒．唱歌