嫻姐早喺一個月前，邀請身兼港大經濟金融學院榮譽教授嘅中策集團主席馬時亨，喺前日全港學生開學日到勞工子弟中學擔任開學禮專題演講嘉賓，同學生分享點樣裝備自己面對未來挑戰。

肥亨送畀學生嘅錦囊，就係希望學生要學識喺「危」中睇到機會，事關有危自有機。佢引述英國前首相邱吉爾名言，話悲觀主義者喺每個機會中只會見到重重困難同危機，但樂觀主義者就喺每個困難中睇到無窮機會。佢仲話活生生嘅例子就係本港畢業生害怕面對內地專才流入造成競爭，如果樂觀面對，可以喺競爭中學習對手嘅長處。