香港工業總會尋晚舉行金禧會慶晚宴，慶祝成立五十周年。好多人都慨嘆香港工業式微，但幾位工總前揸弗人都唔係好認同。嚟撐場嘅立法會議員梁君彥話依家香港工業界喺中港聘請嘅員工總數仲有七、八百萬人，雖然比起高峰期嘅一千二百萬人係少咗啲，但都算OK啦！
不過，生產力促進局主席陳鎮仁就覺得工業界面對嘅挑戰依然好大。例如廣東省起草緊嘅《企業民主管理條例》，就對廠商嘅影響好大，事關條例要求港企嘅董事會中，勞工代表要有三成，咁對企業嘅運作影響好深㗎！所以佢哋過兩日都要派高層去參加諮詢會，表達港企嘅關注。工總主席孫啟烈都話，港企面對嘅壓力，仲有工資上漲同埋缺工等問題。
唔少工業家第二、三代亦開始蒲頭。立法會議員林健鋒因為跟隨特首出訪俄羅斯，所以缺席尋晚嘅盛會，由囝囝陪同爺爺林亮一齊現身，但見到相機就好怕醜，就算爺爺叫佢一齊影相都唔肯。平時好少蒲頭嘅林亮甫出現就引起一陣騷動，錢果豐好恭敬咁叫佢做師傅，笑稱除咗學做生意之外，最緊要係學佢點樣做人。