本文重點
發生香港旅行團浴血菲律賓慘劇後，港府即時向菲國發出黑色旅遊警示，呼籲市民唔好再去菲國。立法會旅遊界議員阿Paul謝偉俊早前講過，唔同意港府繼續以黑色旅警作為手段對付菲國，旋即惹嚟市民狂轟，話佢冷血兼只顧業界利益，更有人向立法會投訴佢添！
質疑菲國比阿富汗危險？
一向都好大膽說「不」嘅阿Paul，雖然中咗箭，尋日喺立法會特別會議辯論有關呢次慘劇嘅動議上發言時，唔知係咪為咗補鑊，竟然主動提起黑色旅警單嘢。
佢話發出黑色旅警，理應有一個客觀標準，視乎「危機」係咪有持續性同埋針對遊客。佢直言本港對伊拉克同阿富汗都冇發黑色旅遊警示，質疑菲國係咪真係比呢啲「高危」國家更危險喎。
佢又話，依家好多香港人都要過去菲國做生意，如果一直發黑色旅警嘅話，呢班被迫去菲國嘅人一旦出事保險都冇得賠，變相「好心做壞事」。阿Paul講咁多嘢，都係想死撐自己唔係只着緊自己業界利益啫！