咪睇施文信平時一本正經，其實相當鬼馬。話說工作人員為咗營造「動土」嘅氣氛，等班嘉賓入座後，即時上前替嘉賓試戴安全帽，點知施文信竟然話唔想戴，怕會整亂個髮型喎！佢當然係講笑啦，跟住仲主動戴頂帽添。

話說陳智思致辭後冇將個咪架校低，身材較矮嘅施文信上台致辭時即刻自嘲，話自己次次上台都要校番低個咪架，對佢嚟講係災難喎。話音甫落，即時引起哄堂大笑。

講起宿舍，校長陳玉樹透露以前讀學士時住喺港島，每日都長途跋涉去中大崇基學院返學。當年坐嘅火車仲要燒煤，過隧道後乘客塊面全部黑晒。後來家人建議佢搬去近啲嘅地方，結果就搬咗去學校附近嘅赤泥坪，第二年就住大埔，第三年搬去粉嶺，直到最後一年先可以住宿舍，所以佢好明白學生冇得住宿舍嘅苦況。