南區區議會薄扶林選區補選喺嚟緊嘅禮拜日進行投票，參選嘅兩大陣營尋日把握機會各自晒冷。匯賢智庫立法會議員葉劉淑儀搵咗著名飲食節目主持人蘇施黃幫劉應東站台，當區前區議員、特首辦特別助理陳岳鵬亦唔避嫌請咗成個禮拜假幫手；公文袋都不遑多讓，請嚟一班泛民戰友搞個誓師大會撐司馬文。
泛民喺政改一役一度分裂，尋日難得企埋一齊嚟迎戰匯賢。喺司馬文嘅造勢大會上，白鴿黨主席何俊仁現身撐場，社民連副主席吳文遠同身為民協嘅立法會議員張國柱都畀面出席。據聞白鴿黨中委通過動議支持司馬文，至於司馬文袋唔袋到佢哋嘅鐵票，就要睇過至知嘞。
匯賢嘅劉應東都唔弱，蘇施黃尋日簽署咗支持同意書，公開支持劉應東參選，仲盛讚佢年輕實幹，係個難得有心人。葉劉預告嚟緊會搵埋海洋公園主席盛智文幫拖，為劉應東站台。建制派同泛民兩陣喺呢次補選對壘，究竟誰勝誰負？禮拜日就會揭曉。