充闊佬參加補選

話說公文袋豪擲逾一百萬元資助袋巾傑同陳淑莊分別落場參戰九龍東同港島補選，其實佢哋根本係打腫塊面充肥佬，事關呢一百萬元係預留畀出年區議會選舉嘅「儲糧」，當中有八成即係八十萬元係用喺陳淑莊身上，佢重返立法會後當然要還啦！

根據選舉條例，立法會選舉候選人取得百分之五以上選票，每張選票可獲津貼十一元，最高唔超過選舉總開支一半。喺港島區補選咁多候選人當中，只有陳淑莊可以攞到呢筆津貼，以佢得票十萬零三千幾票計，應可獲發七十萬元。但係選舉結束距今幾個月，呢筆錢仍未落到袋，佢尋日都呻話唔知點算。

點解政府扣起筆錢？冇理由賴帳啩！因為有官司未解決囉。話說喺立法會補選中落敗嘅港島選區候選人李振雄，指香港電台製作嘅介紹候選人節目處理不當，並為選舉管理委員會把關不力，喺選舉後入稟高院，提出選舉呈請，要求推翻選舉結果。

回水或拖到出年

呢單case早前已經過堂，排期十月下旬喺高院開審，就因為咁，政府咪要hold住筆津貼，等法院裁決後先處理囉。

本來放到喺嘴唇邊嗰七十萬元津貼都食唔到，陳淑莊當然好無奈啦，但喺變相「公投」一役後已經被榨乾榨淨咁滯嘅公文袋就更心噏，事關一心諗住陳淑莊嗰七十萬元選舉津貼回水之後，可以紓緩吓財困問題，尤其係可以揼番啲水留畀出年區議會選舉㗎嘛，點知咁多阻滯。

公文袋依家最大嘅問題係，無論選舉呈請嘅裁決係點樣，都可能有人會提出上訴，跟住又要喺法院排期再審，分分鐘拖多幾個月，拖到出年區議會選舉，公文袋都乾晒塘啦，仲唔愁爆咩！