先唔計周不時有人失足墮軌甚至諗唔開跳軌自殺，嗰啲冇裝幕門嘅月台，企喺度等車，同列車可以「零距離」接觸，諗起都驚。尤其係繁忙時段，地方淺窄，你推我擁，周時險象環生。

港鐵早前宣布喺八個地面車站加裝月台幕門嘅計劃，港島杏花邨同柴灣站嘅工程今年四月開工，九龍灣、牛頭角、葵芳同葵興站亦喺七月展開工程，荃灣站同觀塘站幕門安裝工程會喺明年二月展開。

工程明年初開波已經夠晒遲，但遲到總好過冇到，最緊要等乘客放心搭車。不過，任何事經呢班官老爺去做，梗會好似食咗成擔豬油咁，拖拖拉拉，慢慢吞吞。

嗱，原本話今年七月施工嘅九龍灣站，原來乜都未裝，完工時間遲硬。荃灣站工程話就話明年二月開工，有區議員踢爆，實際排期要明年五月至開得工，港鐵連解釋都冇句。

叮！一個車站，兩邊月台，裝幕門啫，又唔係做登月飛船太空艙，使唔使咁耐呀？有荃灣區議會議員話，佢哋六、七年前已經向港鐵爭取加設月台幕門，「真係等到頸都長」，希望工程可以盡快施工。唉，市民等咗六、七年，家陣仲要一等再等，條頸睇怕仲要再長啲至可以等得到咯。

咪以為港鐵做乜都好似烏龜咁呀，如果對自己有着數，做起嚟仲快過兔仔狂奔。呢，同樣係為加裝月台幕門，港鐵前身地鐵公司九年前已經以呢個名義，向使用八達通乘客每程多收一毫，話要補貼高昂嘅建造費用喎。

叮！受人錢財，替人消災。港鐵啱啱相反，收錢唔做嘢，拖無可拖要開工，就拖完工時間。唔怪得港鐵做大股東嘅八達通公司明益自己，將用戶私隱當貨咁通街賣，做起嚟快過打針，話咁快就賣咗二百幾萬個用戶私隱喇。

港鐵攞着數唔止快，仲有一招叫賺到盡，一啲都唔蝕底。呢，港鐵多年來已經透過一毫附加費，累積收咗好幾億月台幕門安裝費，但幕門裝咗幾多，市民有數可計。

政府係港鐵最大股東，為保障乘客安全，有義務敦促港鐵加快工程進度。但運輸及房屋局高官前排仲撐港鐵繼續掠水，話截至舊年年底「只收回」七億三千萬建造費，未來要繼續收，估計最快要二○一七年至收齊。

港鐵掠水快過人，做嘢慢三拍。車站月台幕門工程拖完一年又一年都未全部完成，政府居然熟視無睹，繼續縱容。計太一叮話齋，咁搞法，睇怕一日未收足附加費，工程都唔會完工咯。