王梓軒的爸爸王英偉好架勢，數不盡的榮譽與名銜包括獲授銀紫荊星章、港區全國人大代表、上市公司主席及浸大校董會主席等。不過，王梓軒鮮有提及，皆因他怕透露自己顯赫家世，會令人忽略他的努力。他說：「我同爹哋範疇唔同，雖然佢有投資喺唱片公司，但始終係商界，唔熟樂壇嘅嘢。佢能幫到我嘅就只有同我分享做公眾人物嘅心得。」
原來，王英偉最緊張兒子待人接物的態度：「爹哋教我唔使刻意諗太多修飾自己，只要保持真性情就得，因為記者好醒，你份人真定假，講兩句就會知。」
在別人眼中如模範父子的他們，原來曾經一度疏離！事件發生在兩年前，Jonathan剛完成美國學業回家，「離家七年，我同父母性格都有變。返嚟頭半年，屋企多咗我，大家都唔慣。以前我乜都自己決定，但依家要同父母交代，我會諗，究竟交代嚟有咩用，所以有爭拗。」
不過，這段磨合期只維持了半年：「爹哋聽開張學友，當佢第一次聽我啲歌，忍唔住問『乜依家興呢啲㗎咩？』而媽咪就幫我Keep剪報！」