澳門積極吸台灣旅客

包括副主席「單雞」單仲偕在內嘅幾個白鴿黨核心，上禮拜都去咗台灣考察，尋日講開鬍鬚曾參觀完誠品已經鬆毛鬆翼，單雞就忍唔住寸佢Out爆，單雞話：「誠品？十幾年前嘅嘢啦！九六年我去睇李登輝選舉時已經去過啦！」

佢又話去到台北時，咁啱撞到澳門政府搞嘅澳門周，吸引台灣人去澳門，仲有就係好多台灣人想嚟香港玩，但台灣方面想同鬍鬚曾傾免入境簽證，鬍鬚曾就咦咦哦哦，點知轉過背台灣就推出網上免費簽證嚟吸港客，唔明點解港府對台灣問題保守兼落後。

單雞又自爆疑似特首候選人之一嘅行政會議召集人CY梁振英，日前都有送本著作畀佢，偏偏就寫錯佢個「偕」字做「佳」，覺得有啲無奈同心淡。