「羅桂祥綜合生物醫學大樓」總建築面積逾一萬八千平方米，樓高九層，預計二○一二年首季落成。尋日喺地盤舉行大樓奠基儀式，由於天氣酷熱，一眾嘉賓熱到汗流浹背。好彩羅家夠細心，即場大派家族旗下嘅維他奶同多款維他飲品，賓客得以解渴兼降溫。

羅家上下總動員主持奠基儀式，維他奶國際集團執行主席Winston羅友禮聯同兄長羅開敦、三個姊妹羅慕貞、羅慕連同羅慕玲，以及姪仔兼羅桂祥基金主席Peter羅德承齊齊亮相。羅家同中大淵源深厚，七十年代起已捐唔停，但講到一筆過捐一億五咁多，今次就係首次，事關今年係維他奶踏入七十周年，捐錢做善事回饋社會，順便慶祝生日，一舉兩得！

Winston話希望利用部分捐款，加強對大豆等農產品研究，事關爸爸羅桂祥當年發現豆奶營養豐富，因而創立維他奶王國，大豆咁正，好應該再細心鑽研發掘佢嘅好處喎。