建仔搞嘅「新一代政治專才文憑課程」九月中開課，喺一百一十四個報讀者中，甄選取錄咗三十九人，最特別嘅係，授課講者中竟有三個泛民學者，其中一個仲係公文袋黨員黃洪。由佢哋授課講書，建仔唔怕黨員被洗腦呀？
「新一代政治專才文憑課程」係建仔首個開放畀非黨員參加嘅課程，三十九名學員中，除六人係建仔職員，其餘都係外人，但相信遲早會被建仔踢入黨。授課講者有兩位前高官馬時亨同羅范椒芬，分別教香港金融業同公共政策訂定，「卡士」算唔錯，但論「創意」，就要數搵嚟本身屬公文袋嘅中大社工系副教授黃洪講貧窮問題、普選聯嘅中大社會學系副教授陳健民講「中國的困境與出路」，以及港大法律學院副教授戴耀廷教香港政制。
呢三位學者同泛民同聲同氣，隨時借授課喺建仔搞策反行動噃！不過，課程旗手、建仔副主席張國鈞話邀請學者唯才是問，唔考慮政治因素喎！