香港青年聯會前晚搞會慶同新一屆會董會就職典禮，場內見到着住中山裝嘅常委阿Ken朱鼎健，佢話因為想襯番個場合，特登去買咗件中山裝出席活動。平時男士着中山裝，大多數都係扣晒所有鈕，但佢就扣剩最上嗰兩粒，唔通佢想玩突出？非也！佢只係扣唔埋啫，事關佢件衫係現成買，就得個胸嚟就就唔到條腰，所以權衡輕重，最後佢都係揀就條腰就算嘞！
本來阿Ken都幾大隻，嗰晚睇落佢又健碩咗。佢話以前每晚淨係做三百下掌上壓，依家加多五百下sit up，大概二十分鐘左右就完成。佢話每日投資半個鐘做運動係對健康嘅投資，有健康就有衝勁、有將來，所以佢幾忙都會抽時間做運動，唔會偷懶喎！
同樣都係運動達人嘅立法會議員林大輝，就笑笑口咁話自己胸襟冇阿Ken咁大，加上最近立法會放暑假，所以佢除咗忙住出門同執番張工作枱之外，仲要不停約朋友食飯還飯債，難怪佢肥咗幾磅。但佢話自己好夠氣，好似踢波咁，踢勻上下半場都冇難度。