喺上禮拜一發生馬尼拉慘劇後，有「周一鑊」之稱嘅食物及衞生局局長周一嶽一直冇蒲頭，只見副局長梁卓偉為慘劇傷者做善後嘅籌劃工作，原來周一鑊放緊假唔喺香港。尋日係學生哥開學日，亦係佢放完假後首日返工，佢一返工就唔敢怠慢，朝早同醫管局主席「肥胡」胡定旭同梁卓偉，帶埋花籃去屯門醫院探望Jason同梁太，佢哋傾咗半個鐘左右，周一鑊離開前仲去醫院大堂貼上寫畀Jason嘅心意卡。
周一鑊又即場解畫，話休假期間唔喺香港，但最重要嘅考慮係派醫務人員去菲律賓處理問題；之後話事發當日派人去菲律賓，將生還者同死者遺體運返香港嘅決定正確。不過佢都有補鑊，話喺今次事件當中，自己嘅遺憾係唔可以親自並立即慰問死難者家屬同傷者。
佢仲堅持佢哋係一個團隊，雖然自己唔喺香港，但每日都有同啲同事溝通，日日都同梁卓偉交談幾次、發吓電郵了解情況咁話喎。呢個解釋，唔知大家收唔收貨呢？